പുതിയ കാര്‍ഷിക നിയമം കര്‍ഷകരെ ശക്തിപ്പെടുത്താനാണെന്ന് പ്രധാനമന്ത്രി നരേന്ദ്ര മോദി. ഇടനിലക്കാരെ സഹായിക്കാനാണ് ചിലര്‍ കാര്‍ഷിക നിയമത്തെ എതിര്‍ക്കുന്നത്. സര്‍ദാര്‍ വല്ലഭായി പട്ടേലിന്റെ 145ാം ജന്മദിന പരിപാടികളുടെ ഭാഗമായി ഏകതാ ദിവസ് പരിപാടിയില്‍ സംസാരിക്കുകയായിരുന്നു പ്രധാനമന്ത്രി.
ഇന്ത്യയിലെ കോവിഡ് പോരാളികളെ ലോകം പ്രശംസിക്കുകയാണ്. ഐക്യവും വൈവിധ്യവുമാണ് നമ്മുടെ കരുത്ത്. ഭീകരവാദത്തിനെതിരെ ലോകം ഒന്നിച്ച് നില്‍ക്കണം. ഭീകരവാദത്തിലൂടെ ആര്‍ക്കും നേട്ടം ഉണ്ടാകില്ല. ഭീകരരെ നേരിടുന്നതില്‍ ഇന്ത്യക്ക് ഒരുപാട് ജവാന്മാരെ നഷ്ടമായി. അത് രാജ്യം മറക്കില്ല. അതിര്‍ത്തിയിലെ ഏത് വെല്ലുവിളി നേരിടാനും ഇന്ത്യ സജ്ജമാണ്. പുല്‍വാമ ആക്രമണത്തില്‍ രാഷ്ട്രീയം കളിക്കാനാണ് ചിലരുടെ ശ്രമം. ഇത്തരക്കാരെ രാജ്യം മറക്കില്ല. ജമ്മുകശ്മീരിലെ 370 ാം അനുഛേദം റദ്ദാക്കണം എന്നത് സര്‍ദാര്‍ വല്ലഭായി പട്ടേലിന്റെ ആഗ്രഹമായിരുന്നുവെന്നും നരേന്ദ്ര മോദി പറഞ്ഞു.
ഗുജറാത്തിലെ കെവാഡിയയില്‍ നര്‍മ്മദ നദീതീരത്തുള്ള പട്ടേല്‍ പ്രതിമയില്‍ പ്രധാനമന്ത്രി നരേന്ദ്ര മോദി പുഷ്പാര്‍ച്ചന നടത്തി. ഏകതാ ദിവസിന്റെ ഭാഗമായുള്ള പരേഡിലും പങ്കെടുത്തു.
