പത്താം ക്ലാസ് പരീക്ഷാഫലം വരുമ്പോള്‍ കുട്ടികള്‍ക്കുണ്ടാകുന്ന സംശയ നിവാരണത്തിന് ഹയര്‍സെക്കന്‍ഡറി വിഭാഗത്തിന്റെ കീഴിലുള്ള കരിയര്‍ ഗൈഡന്‍സ് ആന്‍ഡ് കൗണ്‍സിലിംഗ് സെല്‍ പ്രത്യേക കൗണ്‍സിലിംഗ് സെഷനുകള്‍ നടത്തുമെന്ന് പൊതുവിദ്യാഭ്യാസൃതൊഴില്‍ വകുപ്പ് മന്ത്രി വി ശിവന്‍കുട്ടി. പത്താം ക്ലാസ് പരീക്ഷ എഴുതിയ വിദ്യാര്‍ത്ഥികള്‍ക്കായുള്ള കരിയര്‍ ഗൈഡന്‍സ് പ്രോഗ്രാം ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി
ഹയര്‍ സെക്കന്‍ഡറി വിഭാഗത്തിലെ വിദ്യാര്‍ത്ഥികളുടെ കരിയര്‍ സംബന്ധമായ സഹായങ്ങളും കൗമാരക്കാരുടെ മാനസികാരോഗ്യം കാത്തുസംരക്ഷിക്കാനുമുള്ള വിവിധ പ്രവര്‍ത്തനങ്ങളുമാണ് സെല്‍ ഇപ്പോള്‍ നടത്തിവരുന്നക്. ഇതിന്റെ തുടര്‍ച്ചയെന്നോണം സ്‌കൂളുകളില്‍ സൗഹൃദ ക്ലബ്ബുകളും ക്ലബ്ബിന്റെ കോര്‍ഡിനേറ്റര്‍മാരും പ്രവര്‍ത്തിച്ചുവരുന്നു.
കഴിഞ്ഞ ദിവസങ്ങളില്‍ പ്ലസ്ടു പരീക്ഷ എഴുതിയിരിക്കുന്ന വിദ്യാര്‍ത്ഥികള്‍ക്കായി ആഫ്റ്റര്‍ പ്ലസ് എന്ന പേരില്‍ 18 ദിവസം നീണ്ടു നിന്ന കരിയര്‍ വെബിനാര്‍ സംഘടിപ്പിച്ചിരുന്നു. പത്താം ക്ലാസ് പരീക്ഷ എഴുതിയ വിദ്യാര്‍ത്ഥികള്‍ക്കായി 5 ദിവസത്തെ കരിയര്‍ ഗൈഡന്‍സ് പ്രോഗ്രാം ആണ് ആരംഭിച്ചത്. പത്താം ക്ലാസ് പരീക്ഷ എഴുതിയ കുട്ടിയെ സംബന്ധിച്ചിടത്തോളം അവരുടെ അഭിരുചിക്കനുസരിച്ച് സാധ്യമായ തുടര്‍പഠന മേഖലകളും തൊഴില്‍ സാധ്യതയുമാണ് ഇതിലൂടെ കുട്ടികളില്‍ എത്തിച്ചേരുന്നത്.
വിഎച്ച്എസ്ഇ, ടെക്‌നിക്കല്‍ ഹയര്‍ സെക്കന്‍ഡറി, പോളി ടെക്‌നിക് തുടങ്ങിയ വിവിധ സാധ്യതകള്‍ പത്താം ക്ലാസിന് ശേഷം ഉണ്ടെന്ന് കുട്ടികളെ പരിചയപ്പെടുത്തുന്നതിനു വേണ്ടിയാണ് ഈ പരിപാടി നടത്തുന്നതെന്നും മന്ത്രി അറിയിച്ചു.
