വൈദ്യുതിയും വെള്ളവും പുനഃസ്ഥാപിക്കണമെന്നും കസ്റ്റഡിയില്‍ ഉള്ളവരെ വിട്ടയക്കണമെന്നും കര്‍ഷക സംഘടനകള്‍. ഇക്കാര്യങ്ങള്‍ നടപ്പിലാക്കിയാല്‍ മാത്രമേ സര്‍ക്കാരുമായി ചര്‍ച്ചക്കുള്ളൂവെന്ന് സംയുക്ത കിസാന്‍ മോര്‍ച്ച വീണ്ടും വ്യക്തമാക്കി.
രാജ്യവ്യാപകമായി മഹാ പഞ്ചായത്ത് വിളിക്കുമെന്നും ശനിയാഴ്ച വഴിതടയല്‍ സമരം നടത്തുമെന്നും ബികെയു നേതാവ് രാകേഷ് ടികായത്ത് പറഞ്ഞു. ട്രാക്ടര്‍ റാലിക്കിടെ മരിച്ച രാംപൂര്‍ സ്വദേശി നവരീത് സിങ്ങിന്റെ വസതി പ്രിയങ്ക ഗാന്ധി ഇന്ന് സന്ദര്‍ശിക്കും. അതെസമയം കാര്‍ഷിക നിയമങ്ങളില്‍ ഇന്നും ലോക്‌സഭ പ്രക്ഷുബ്ധമാകും.
ഡല്‍ഹി അതിര്‍ത്തികളിലെ സമരം 71ാം ദിവസത്തിലേക്ക് കടന്നു. വെള്ളവും വൈദ്യുതിയുമില്ലാതെ ബാരിക്കേഡുകളും ഇരുമ്പ് വേലികല്‍ കൊണ്ട് ചുറ്റപ്പെട്ട പൊലീസ് സംവിധാനത്തിന് നടുക്കാണ് സമരഭൂമികളെല്ലാം നിലകൊള്ളുന്നത്. ചര്‍ച്ചക്ക് തയ്യാറാണെന്ന് വേദികള്‍ മുഴുവന്‍ പറയുന്ന പ്രധാനമന്ത്രി നരേന്ദ്ര മോദി അതിനുള്ള സാഹചര്യം ഒരുക്കണമെന്നാണ് കര്‍ഷക സംഘടനകളുടെ ആവശ്യം.
അതിര്‍ത്തികളിലൈ ഇന്‍ര്‍നെറ്റ് സേവനം പുനഃസ്ഥാപിച്ചതായി ആഭ്യന്തരമന്ത്രാലയം അറിയിച്ചിട്ടുണ്ട്. മുസഫര്‍ നഗറിലും ഭാഗ്പത്തിനും പിന്നാലെ ജിന്ദില്‍ നടന്ന മഹാ പഞ്ചായത്തില്‍ 50,000 ത്തോളം പേരാണ് പങ്കെടുത്തത്. മഹാ പഞ്ചായത്തുകള്‍ വിളിക്കുന്നത് തുടരുമെന്ന് ബികെയു നേതാവ് രാകേഷ് ടികായത്ത് വ്യക്തമാക്കി.
അതെസമയം, നന്ദിപ്രമേയ ചര്‍ച്ചയാണ് ലോക്‌സഭയില്‍ നടക്കേണ്ടത്. ഇന്നലെ ശക്തമായ പ്രതിപക്ഷ പ്രതിഷേധത്തെ തുടര്‍ന്ന് സഭ നടപടികള്‍ മുന്നോട്ട് പോയില്ല. രാജ്യസഭയില്‍ ഇന്നലെ ആരംഭിച്ച നന്ദി പ്രമേയ ചര്‍ച്ച തുടരും. കാര്‍ഷിക വിഷയവും ഉന്നയിക്കുന്നതിനാല്‍ ചോദ്യോത്തര-ശ്യൂന വേളകള്‍ ഒഴിവാക്കിയാണ് 15 മണിക്കൂര്‍ ചര്‍ച്ച. ചര്‍ച്ചക്ക് ശേഷം പ്രധാനമന്ത്രി നരേന്ദ്ര മോദി മറുപടി പറയും.
