ട്രാഫിക് നിയമലംഘനം സ്ഥിരമാക്കുന്നവര്‍ ശ്രദ്ധിച്ചില്ലെങ്കില്‍ വാഹനത്തിന് ഇന്‍ഷൂറന്‍സ് പുതുക്കുമ്പോള്‍ വലിയ വില കൊടുക്കേണ്ടി വരും. ഇന്‍ഷൂറന്‍സ് റെഗുലേറ്ററി അതോറിറ്റി നിരന്തരം ട്രാഫിക് ലംഘനം നടത്തുന്നവര്‍ക്ക് കൂടുതല്‍ പ്രീമിയം ഏര്‍പ്പെടുത്തണമെന്ന അന്തിമ റിപ്പോര്‍ട്ട് നടപ്പാക്കാന്‍ ഒരുങ്ങുകയാണ്. അതായത് നിങ്ങളുടെ വാഹന ഇന്‍ഷൂറന്‍സ് പ്രീമിയം ഉയരും.
തുടക്കമെന്ന നിലയില്‍ ആദ്യം ഡെല്‍ഹിയിലും പിന്നീട് രാജ്യമാകെ വ്യാപിപ്പിക്കാനായി നിയമം നടപ്പാക്കാനാണ് റെഗുലേറ്ററി അതോറിറ്റിയുടെ തീരുമാനം. ഐആര്‍ഡിഎഐ വര്‍ക്കിങ് ഗ്രൂപ്പ് ഇതിനുള്ള പൂര്‍ണ റിപ്പോര്‍ട്ട് തയ്യാറാക്കി നല്‍കിയിട്ടുണ്ട്. ഇതിനായി അതത് സംസ്ഥാനങ്ങളിലെ ട്രാഫിക് പൊലീസ് വകുപ്പുകളില്‍ നിന്നും ഇന്‍ഷൂറന്‍സ് ഇന്‍ഫര്‍മേഷന്‍ ബ്യൂറോ വിവരങ്ങള്‍ ശേഖരിച്ച് ഇന്‍ഷൂറന്‍സ് കമ്പനികള്‍ക്ക് നല്‍കും. പിന്നീട് വാഹനങ്ങളുടെ പോളിസി പുതുക്കുമ്പള്‍ അവസാനത്തെ രണ്ട് വര്‍ഷം വാഹനം നടത്തിയ ട്രാഫിക്ക് നിയമലംഘനങ്ങളുടെ റെക്കോര്‍ഡ് നോക്കി മാര്‍ക്കിട്ട് അതിനനുസരിച്ചാകും പ്രീമിയത്തില്‍ വര്‍ധന ഉണ്ടാകുക.
നിയലംഘനം നടത്തുന്നവര്‍ക്ക് ഉയര്‍ന്ന പ്രീമിയം ഈടാക്കുന്നതോടൊപ്പം മര്യാദക്കാര്‍ക്ക് ഇളവും ലഭിക്കും. മികച്ച ഡ്രൈവിങ് പ്രോത്സാഹിപ്പിക്കുന്നതിനും ഒപ്പം ട്രാഫിക് നിയമലംഘനങ്ങള്‍ മൂലമുണ്ടാകുന്ന അപകടങ്ങള്‍ കുറക്കുന്നതിനും വേണ്ടിയാണ് ഇതെന്ന് വിലയിരുത്തപ്പെടുന്നു.
