ചലച്ചിത്ര അക്കാദമിയിൽ ഇടതുപക്ഷ പ്രവര്‍ത്തകരെ അനധികൃതമായി നിയമിക്കാന്‍ കൂട്ടു നില്‍ക്കുകയാണ് എന്ന് പ്രതിപക്ഷ നേതാവ് രമേശ് ചെന്നിത്തല. സംവിധായകന്‍ കമൽ ചലച്ചിത്ര അക്കാദമിക്ക് വേണ്ടി എഴുതിയ കത്ത് ഉയര്‍ത്തിപിടിച്ചാണ് രമേശ് ചെന്നിത്തല സര്‍ക്കാരിനെതിരെ രൂക്ഷ വിമര്‍ശനം ഉന്നയിച്ചത്.
അക്കാദമിയുടെ ഇടത് സ്വഭാവം നിലനിര്‍ത്താന്‍ ഇടത് അനുഭാവം ഉള്ളവരെ സ്ഥിരപ്പെടുത്തണമെന്നാണ് കത്തിലെ ആവശ്യം. ഇടതുപക്ഷ അനുഭാവികളും ഇടതുപക്ഷ പുരോഗമന മൂല്യങ്ങളിലൂന്നി സാംസ്‌കാരിക രംഗത്ത് നിലകൊള്ളുന്ന ജീവനക്കാരെ സ്ഥിരപ്പെടുത്തുന്നത് കേരളത്തിലെ സാംസ്‌കാരിക സ്ഥാപനങ്ങളില്‍ സമുന്നതമായ സ്ഥാനമുള്ള ചലച്ചിത്ര അക്കാദമിയുടെ ഇടതുപക്ഷ സ്വഭാവം നിലനിര്‍ത്തുന്നതിന് സഹായിക്കും എന്നും കത്തിൽ പറയുന്നു.
ചലച്ചിത്ര അക്കാദമിയെന്താ എ.കെ.ജി സെന്ററിന്റെ പോഷക സംഘടനയാണോയെന്ന് പ്രതിപക്ഷ നേതാവ് ചോദിച്ചു. നിയമത്തെയും ചട്ടത്തെയും കാറ്റില്‍പറത്തി ഇടതുപക്ഷക്കാരെ സ്ഥിരപ്പെടുത്തണമെന്നാണ് ഒരു അക്കാദമി ചെയർമാൻ ആവശ്യപ്പെട്ട് കത്തെഴുതുന്നതെന്നും ചെന്നിത്തല പറഞ്ഞു. ചെയര്‍മാന്‍റെ ആവശ്യം മന്ത്രി എ.കെ ബാലന്‍ തള്ളിയിട്ടുണ്ടെന്നായിരുന്നു മുഖ്യമന്ത്രിയുടെ പ്രതികരണം.
