പ്രായം കുറഞ്ഞ മേയറാകുന്ന തിരുവനന്തപുരത്തെ ആര്യ രാജേന്ദ്രന് ആശംസയുമായി പതിനൊന്നു വർഷം മുൻപ് ഇരുപത്തിയൊന്നാം വയസിൽ നഗരസഭ അധ്യക്ഷയായ സുമൻ കോലി. ആര്യ മേയർ ആകുന്നെന്ന പത്രവാർത്ത പങ്കുവച്ചുകൊണ്ട് ‘ചരിത്രം ആവര്‍ത്തിക്കുകയാണ്’ എന്ന് സുമന്‍ കോലി ഫേസ്ബുക്കില്‍ കുറിച്ചു.
രാജസ്ഥാനിലെ ഭരത്പൂര്‍ നഗരസഭയിലാണ് 2009ൽ സുമന്‍കോലി ഇരുപത്തിയൊന്നാം വയസിൽ അധ്യക്ഷ പദവിയിലെത്തുന്നത്. സുമൻ കോലി സ്ഥാനമേൽക്കുമ്പോൾ ഭരത്പൂർ മുൻസിപ്പൽ കോർപറേഷനായിരുന്നില്ല, മുൻസസിപാലിറ്റി മാത്രമായിരുന്നു. അതുകൊണ്ടുതന്നെ മുൻസിപ്പൽ ചെയർപേഴ്സൻ പദവിയാണ് അവർ വഹിച്ചത്. എന്നാൽ നാലു വർഷത്തിനുശേഷം 2014ൽ ഭരത്പൂർ കോർപറേഷനായി മാറിയതോടെ സുമൻ കോലി മേയർ പദവിയിലേക്കു മാറുകയായിരുന്നു. ബിജെപി പ്രതിനിധി ആയിട്ടായിരുന്നു സുമന്‍ കോലി കൗൺസിലറായി വിജയിച്ചത്.
