ലൈഫ് മിഷന്‍ പദ്ധതിയുമായി ബന്ധപ്പെട്ട് മന്ത്രി എ സി മൊയ്തീന്‍ ഉന്നയിച്ച വാദങ്ങള്‍ വിചിത്രമാണെന്ന് അനില്‍ അക്കര എംഎല്‍എ. റെഡ്ക്രസന്റ് യൂണിടാക്കിനെ ചുമതലപ്പെടുത്തിയതിന്റെ ഏതെങ്കിലും രേഖകള്‍ സര്‍ക്കാരിന്റെ കയ്യിലുണ്ടെങ്കില്‍ പുറത്ത് വിടണം. റെഡ്ക്രസന്റും ലൈഫ് മിഷനുമായിട്ടാണ് ധാരണയെന്ന് കരാര്‍ പറയുന്നു. യൂണിടാക്കിനെ നിയോഗിക്കണമെന്ന കത്ത് റെഡ്ക്രസന്റിന് നല്‍കിയിട്ടുണ്ട്.
യൂണിടാക്ക് വടക്കാഞ്ചേരിയില്‍ സോയില്‍ ടെസ്റ്റ് നടത്തിയിട്ടില്ല. പണി തീര്‍ന്ന ശേഷം സോയില്‍ ടെസ്റ്റ് നടത്താമെന്നാണ് മന്ത്രി മൊയ്തീന്‍ പറയുന്നത്. സോയില്‍ ടെസ്റ്റ് എന്താണെന്ന് മന്ത്രിക്ക് വല്ല വിവരവുമുണ്ടോ. യുഎഇയിലെ മാധ്യമങ്ങളില്‍ വന്ന വാര്‍ത്തകളുടെ അടിസ്ഥാനത്തിലാണ് റെഡ്ക്രസന്റ് 500 കോടി രൂപ നല്‍കുമെന്ന് പറഞ്ഞത്.
യൂണിടാക്കുമായി കരാറുണ്ടാക്കാന്‍ യുഎഇ കോണ്‍സുലേറ്റിന് അധികാരമില്ലെന്ന് അറിയാത്തവരല്ല ഇവരൊന്നും. അഴിമതി മാത്രമായിരുന്നു ലക്ഷ്യം. വടക്കാഞ്ചേരിയില്‍ ആശുപത്രി പണിയുന്നത് ആരാണെന്ന് മൊയ്തീന്‍ പറയണം. ഇതുമായി ബന്ധപ്പെട്ട് സര്‍ക്കാരിന്റെ പക്കല്‍ രേഖകളില്ലെന്നാണ് വാസ്തവമെന്നും അനില്‍ അക്കര പറഞ്ഞു.
