ജില്ലാ കളക്ടര്‍ അര്‍ജുന്‍ പാണ്ഡ്യന്‍ ഉദ്ഘാടനം ചെയ്തു
ഡിസം 7ന് സായുധ സേനാ പതാക ദിനാതരണത്തിൻ്റെ തൃശൂർ ജില്ലാതല ഉദ്ഘാടനം കളക്ടര്‍ അര്‍ജുന്‍ പാണ്ഡ്യന്‍ കളക്ട്രേറ്റില്‍ നിര്‍വ്വഹിച്ചു. സബ് കളക്ടര്‍ അഖില്‍ വി. മേനോന്‍ അദ്ധ്യക്ഷത വഹിച്ചു. ജില്ലാ സൈനിക ക്ഷേമ ബോര്‍ഡ് പ്രസിഡൻ്റ് ബാലഗോപാലന്‍ ദിനാചരണ സന്ദേശം നല്‍കി.
ജില്ലാ സൈനിക ക്ഷേമ ഓഫീസര്‍ സുരേഷ് കുമാര്‍ ടി, അസി. സൈനിക ക്ഷേമ ഓഫീസര്‍ അബ്ദുള്‍ സലാം, എന്‍.സി.സി കേഡറ്റുകള്‍ തുടങ്ങിയവര്‍ സംബന്ധിച്ചു. കഴിഞ്ഞ വർഷം ഏറ്റവും കൂടുതല്‍ തുക സമാഹരിച്ച ഓഫീസിനുള്ള സമ്മാനം ജോയിന്റ് രജസ്ട്രാര്‍ ഓഫ് കോ-ഓപ്പറേറ്റീവ് സൊസൈറ്റീസിന്റെ പ്രതിനിധി ജില്ലാ കളക്ടറില്‍ നിന്ന് ഏറ്റുവാങ്ങി. ചടങ്ങിനെത്തിയവരെ എന്‍.സി.സി കേഡറ്റുമാര്‍ പതാക ദിന സ്റ്റാമ്പ് അണിയിച്ചു.
യുദ്ധത്തില്‍ വീരചരമം പ്രാപിച്ച ധീരജവാന്‍മാരുടെ ഓര്‍മ്മയ്ക്കു മുന്നില്‍ ആദരാഞ്ജലി അര്‍പ്പിക്കാനും അവരുടെ വിധവകള്‍ക്കും കുടുംബാംഗങ്ങള്‍ക്കും ക്ഷേമവും സുരക്ഷിതത്വവും ഉറപ്പാക്കാനും വേണ്ടിയാണ് എല്ലാ വര്‍ഷവും ഡിസം. 7 സായുധസേനാ പതാക ദിനമായി ആചരിക്കുന്നത്. പ്രത്യേക പതാക വില്‍പന നടത്തി ഒരു നിധി രൂപീകരിക്കുന്നതുകൊണ്ടാണ് പതാക ദിനം എന്ന പേര് വന്നത്. വില്‍പനയിലൂടെ ലഭിക്കുന്ന തുക ദേശസേവനത്തിനിടയില്‍ മരിക്കുന്ന ജവാൻ്റെ ഭാര്യ, കുടുംബാംഗങ്ങള്‍ എന്നിവരുടേയും വിമുക്തഭടന്മാരുടേയും ക്ഷേമ പുനരധിവാസ പ്രവര്‍ത്തനങ്ങള്‍ക്കായി ഉപയോഗിക്കും.
പ്രോത്സഹനമെന്ന നിലയില്‍ ഏറ്റവുംമധികം ഫണ്ട് ശേഖരിക്കുന്ന ജില്ലയ്ക്കും, എറ്റവുമധികം ഫണ്ട് ശേഖരിക്കുന്ന ഏറ്റവും ചെറിയ ജില്ലയ്ക്കും, സ്‌കൂള്‍ കോളേജ് വിദ്യാഭ്യാസ സ്ഥാപനങ്ങള്‍ക്കും എന്‍.സി.സി യൂണിറ്റുകള്‍ക്കും മുഖ്യമന്ത്രിയുടെ പേരിലുള്ള റോളിംഗ് ട്രോഫി സമ്മാനിക്കും.
