വൈദ്യുതി പ്രതിസന്ധിക്ക് പരിഹാരം കാണാന്‍ പകല്‍ സമയത്തെ ഉപയോഗത്തിന് മാത്രമായി നിരക്ക് കുറയ്ക്കാനും രാത്രിയിലെ നിരക്ക് വര്‍ധിപ്പിക്കാനും ആലോചിക്കുന്നുണ്ടെന്ന് മന്ത്രി കെ കൃഷ്ണന്‍കുട്ടി.
പകല്‍ സമയത്ത് വൈദ്യുതി ഉപയോഗം കുറവാണെന്നും ഏറ്റവും കൂടുതല്‍ വൈദ്യുതി ഉപയോഗിക്കുന്നത് രാത്രിയിലാണെന്നും അതിനാല്‍ രാത്രിയിലെ വൈദ്യുതി ഉപയോഗം പരമാവധി കുറയ്ക്കുന്നതിനായാണ് ഈ സമയത്തെ നിരക്ക് വര്‍ധിപ്പിക്കുന്ന കാര്യം പരിഗണിക്കുന്നത് എന്ന് മന്ത്രി പറഞ്ഞു.
ഭൂരിഭാഗം വീടുകളിലും സ്മാര്‍ട്ട് മീറ്ററുകളായെന്നും അതിനാല്‍ ഓരോ സമയത്തെയും വൈദ്യുതി ഉപയോഗം കണക്കാക്കാനാകുമെന്നും അദേഹം പറഞ്ഞു.
കേരളത്തില്‍ ആണവനിലയം പദ്ധതി ആരംഭിക്കാന്‍ പ്രാരംഭ ചര്‍ച്ചകള്‍ പോലും നടന്നിട്ടില്ല. ഇക്കാര്യം സര്‍ക്കാരിന്റെ നയപരമായ കാര്യമാണെന്നും ചര്‍ച്ചകള്‍ക്കുശേഷമേ അതില്‍ തീരുമാനമെടുക്കൂ എന്നും അദ്ദേഹം വ്യക്തമാക്കി. ആണവനിലയം സംസ്ഥാനത്തിനു പുറത്തു സ്ഥാപിച്ചാലും കേരളത്തിനു വൈദ്യുതി വിഹിതം കിട്ടുമെന്നും മന്ത്രി പറഞ്ഞു.
