മലയാളത്തില്‍ കൗമാരങ്ങളുടെ കഥ പറയുന്ന ഒരു സിനിമ കൂടി അണിയറയിൽ ഒരുങ്ങുന്നു. “റബേക്ക സ്റ്റീഫൻ്റെ ചതുരമുറി 6.5 ഇഞ്ച്” . വ്യവസായ മേഖലയില്‍ നിന്നുള്ള ആലപ്പുഴ സ്വദേശിയായ സായ് വെങ്കിടേഷ് ആണ് ഈ സിനിമയിലെ പ്രധാന കഥാപാത്രത്തെ അവതരിപ്പിക്കുന്നത്.
ആശ്വാസ് മൂവി പ്രൊഡക്ഷന്‍സിൻ്റെ ബാനറില്‍ ആശ്വാസ് ശശിധരന്‍ നിര്‍മ്മിക്കുന്ന ചിത്രം സംവിധാനം ചെയ്യുന്നത് പരസ്യ കലാസംവിധായകനായ മുഹമ്മദ് സജീഷാണ്. സംവിധായകൻ തന്നെയാണ് ചിത്രത്തിൻ്റെ രചന ഒരുക്കുന്നത്. ഒട്ടേറെ സിനിമകളില്‍ നിന്നാണ് നിർമാതാവ് കൂടിയായ സായ് വെങ്കിടേഷ് എന്ന സ്വാമി സിനിമയിലേക്ക് ചേക്കേറുന്നത്. ഒരു വടക്കൻ പങ്കാളി, രണ്ടാം പകുതി, കരുവ്, ദ്രാവിഡ രാജകുമാരൻ, ഡസ്റ്റ് ബീൻ തുടങ്ങി ഒട്ടേറെ ചിത്രങ്ങളില്‍ സായ് വെങ്കിടേഷ് തൻ്റെ അഭിനയമികവ് തെളിയിച്ചതാണ്.
ജ്വല്ലറി ബിസിനസ്സ് രംഗത്ത് മൂന്ന് പതിറ്റാണ്ടോളം പ്രവര്‍ത്തിച്ചുവന്ന സ്വാമിക്ക് സിനിമയോടുള്ള പാഷനാണ് ബിസിനസ്സ് രംഗത്ത് നിന്ന് സിനിമാരംഗത്തേക്ക് വരാന്‍ ഇടയാക്കിയത്. ചലച്ചിത്ര മേഖലയുമായി വര്‍ഷങ്ങളായുള്ള ബന്ധങ്ങൾ അദ്ദേഹത്തിന് ചില ചിത്രങ്ങളില്‍ നിര്‍മ്മാണ പങ്കാളിയാകാനും കഴിഞ്ഞിട്ടുണ്ട്. അഭിനയത്തോടൊപ്പം സിനിമയുടെ പുത്തൻ തലമായ ഒടിടി രംഗത്ത് “തീയേറ്റർ പ്ലേ” എന്ന പ്ലാറ്റ്ഫോം സ്വാമിക്കും സുഹൃത്തുക്കൾക്കും ഉണ്ട്. മൂന്ന് സ്ത്രീകഥാപാത്രങ്ങളെ കേന്ദ്രീകരിച്ച് നീങ്ങുന്ന കൗമാരക്കാരുടെ കഥ പറയുന്ന ചിത്രമാണ് “റബേക്ക സ്റ്റീഫൻ്റെ ചതുരമുറി 6.5 ഇഞ്ച്”.
പരസ്യ കലാസംവിധായകനായ മുഹമ്മദ് സജീഷ് രചനയും സംവിധാനവും നിര്‍വഹിക്കുന്ന സിനിമയുടെ ഛായാഗ്രഹണം ടി ഷമീര്‍ മുഹമ്മദും എഡിറ്റിംഗ് ഐജു അന്റുവും നിര്‍വഹിക്കുന്നു. ഷാജി ആലപ്പാട്ടാണ് കോ പ്രൊഡ്യൂസര്‍. സുഹൈല്‍ സുല്‍ത്താന്‍ എഴുതിയ ഗാനങ്ങള്‍ക്ക് യൂനസിയോ സംഗീതം പകര്‍ന്നിരിക്കുന്നു. സിതാര കൃഷ്ണകുമാറാണ് ഗാനം ആലപിച്ചിരിക്കുന്നത്. പുതുമുഖങ്ങളായ ധനു ദേവിക, രമ്യ രഘുനാഥന്‍, പൂജ അരുണ്‍ എന്നിവരാണ് മറ്റ് പ്രധാന കഥാപാത്രങ്ങള്‍ക്ക് ജീവന്‍ പകരുന്നത്. പി.ആര്‍.ഒ: പി.ശിവപ്രസാദ്
