തിരുവല്ല സ്പിരിറ്റ് വെട്ടിപ്പ് കേസ് അന്വേഷണത്തിന് പത്തനംതിട്ട ജില്ല പൊലീസ് മേധാവി ആര്‍ നിശാന്തിനിയുടെ മേല്‍നോട്ടത്തില്‍ പ്രത്യേക സംഘം. മധ്യപ്രദേശ്, എറണാകുളം, തിരുവല്ല തുടങ്ങിയ മൂന്ന് കേന്ദ്രങ്ങളിലായി പൊലീസ് സംഘം അന്വേഷണം നടത്തും.
ടിഎസ്സി സ്പിരിറ്റ് കൊള്ള സംബന്ധിച്ച് 5 ദിവസത്തിനിടെ ഗൗരവകരമായ വിഷയങ്ങള്‍ പുറത്തു വന്ന പശ്ചാത്തലത്തിലാണ് പ്രത്യേക അന്വേഷണ സംഘം ചുമതലയേല്‍ക്കുന്നത്. പത്തനംതിട്ട ജില്ല പൊലീസ് മേധാവി ആര്‍ നിശാന്തിനി നേതൃത്വം നല്‍കുന്ന ടീമില്‍, തിരുവല്ല ഡിവൈഎസ്പി ആര്‍ രാജപ്പന്‍ സിഐമാരായ ബിജു വി നായര്‍, ഇഡി ബിജു തുടങ്ങിയവരും വിവിധ ഉദ്യോഗസ്ഥരുമാണ് ഉള്‍പ്പെട്ടിരിക്കുന്നത്. മധ്യപ്രദേശ്, എറണാകുളം, തിരുവല്ല തുടങ്ങിയ മൂന്ന് കേന്ദ്രങ്ങളിലായി നടക്കുന്ന അന്വേഷണത്തില്‍ നിര്‍ണായക വിവരങ്ങള്‍ പുറത്തുവരുമെന്നും സുപ്രധാന അറസ്റ്റുകള്‍ ഉണ്ടാകുമെന്നുമാണ് സൂചന.
പൊലീസിന് പുറമെ കെഎസ്ബിസി, എക്‌സൈസ് വകുപ്പുകളില്‍ നടക്കുന്ന ആഭ്യന്തര അന്വേഷണത്തിന്റെ ഭാഗമായി ലീഗല്‍ മെട്രോളജി വിഭാഗം വീണ്ടും പരിശോധന നടത്തും. എറണാകുളത്ത് നിന്നുമെത്തുന്ന പ്രത്യേക സംഘം കസ്റ്റഡിയിലെടുത്ത ടാങ്കര്‍ ലോറിയും ടിഎസ്സിയിലെ സംഭരണ ടാങ്കുമാകും പരിശോധിക്കുക. അതിനിടെ നല്ലനിലയില്‍ പ്രവര്‍ത്തിച്ചു വരുന്ന സ്ഥാപനത്തെ തകര്‍ക്കാന്‍ നീക്കം നടക്കുകയാണെന്ന് സിപിഎം ജില്ല കമ്മിറ്റി വിലയിരുത്തി. വിഷയത്തില്‍ സമഗ്ര അന്വേഷണം വേണമെന്ന ആവശ്യം പാര്‍ട്ടി നേതൃത്വത്തെയും എക്‌സൈസ് മന്ത്രിയെയും ജില്ല കമ്മിറ്റി അറിയിച്ചു.
