ഗാര്‍ഹിക പീഡന പരാതികളില്‍ കര്‍ശന നടപടി എടുക്കണമെന്ന് പൊലീസിനോട് നിര്‍ദ്ദേശിച്ച് മുഖ്യമന്ത്രി പിണറായി വിജയന്‍. സ്ത്രീ പീഡന കേസുകള്‍ക്കായി പ്രത്യേക കോടതികള്‍ പരിഗണനയിലുണ്ടെന്നും മുഖ്യമന്ത്രി പിണറായി വിജയന്‍ അറിയിച്ചു.
പൊലീസ് കെട്ടിടങ്ങളുടെ ഉദ്ഘാടനവും ശിലാസ്ഥാപനവും ഓണ്‍ലൈനായി നിര്‍വഹിച്ചുകൊണ്ട് സംസാരിക്കവേ ആയിരുന്നു മുഖ്യമന്ത്രിയുടെ കര്‍ശന നിര്‍ദ്ദേശം. സ്ത്രീകള്‍ക്കെതിരെയുള്ള അതിക്രമങ്ങളില്‍ കര്‍ശന നടപടിയെടുക്കണം. കുറ്റവാളികള്‍ക്കെതിരെ ശിക്ഷ ഉറപ്പ് വരുത്തണം. സ്ത്രീകള്‍ക്കെതിരായ അതിക്രമ കേസുകള്‍ നീണ്ടുപോകാതിരിക്കാനായി പ്രത്യേക കോടതികള്‍ പരിഗണനയിലുണ്ടെന്നും മുഖ്യമന്ത്രി പിണറായി വിജയന്‍ അറിയിച്ചു.
സ്ത്രീധന വിഷയങ്ങള്‍ അടുത്തിടെയായി കേരളത്തില്‍ വീണ്ടും റിപ്പോര്‍ട്ട് ചെയ്തിരിക്കുകയാണ്. നിയമം മൂലം നിരോധിച്ച ഈ സാമൂഹിക വിപത്തിന്റെ പേരില്‍ നമ്മുടെ നാട്ടില്‍ പെണ്‍കുട്ടികളുടെ ജീവിതം ഹോമിക്കപ്പെടുന്ന അവസ്ഥയാണുള്ളത്. ഇത് ഇല്ലായ്മ ചെയ്യാനായി ചില പദ്ധതികള്‍ മുമ്പ് പ്രഖ്യാപിച്ചിരുന്നു. ഇവ വിജയകരമായി നടപ്പാക്കാന്‍ എല്ലാ പൊലീസ് ഉദ്യോഗസ്ഥരുടേയും ആത്മാര്‍ത്ഥമായ സഹകരണം ആവശ്യമാണെന്നും മുഖ്യമന്ത്രി പറഞ്ഞു.
അതിക്രമങ്ങള്‍ തടയാനായി വാര്‍ഡ് തലം മുതല്‍ ബോധവത്ക്കരണം നടത്തും. സ്ത്രീകള്‍ക്ക് ഭയമില്ലാതെ പരാതി നല്‍കാനായുള്ള സാഹചര്യം ഒരുക്കണം. ഏതെങ്കിലും പ്രദേശത്ത് പൊലീസില്‍ പോയി പരാതിപ്പെടാന്‍ സ്ത്രീകള്‍ക്ക് ബുദ്ധിമുട്ടുണ്ടെങ്കില്‍ അങ്ങോട്ട് ചെന്ന് പരാതി സ്വീകരിക്കാനുള്ള സൗകര്യമൊരുക്കണം. ഇതിന്റെ ഭാഗമായി വനിത പൊലീസ് ഉദ്യോഗസ്ഥ പഞ്ചായത്തുകളില്‍ എത്തണമെന്നും അദ്ദേഹം കൂട്ടിച്ചേര്‍ത്തു.
