പരീക്ഷകള്‍ ഓഫ് ലൈന്‍ മോഡില്‍ നടത്തരുതെന്ന് കെഎസ്‌യു. പരീക്ഷകള്‍ എപ്പോഴത്തേയും പോലെ നടത്താനുള്ള സര്‍ക്കാര്‍ തീരുമാനം മാറ്റി ഓണ്‍ലൈന്‍ മോഡിലാക്കണമെന്നാണ് കെഎസ്‌യു ആവശ്യപ്പെടുന്നത്. അധ്യാപകര്‍ക്കും വിദ്യാര്‍ത്ഥികള്‍ക്കും വാക്‌സിനേഷന്‍ നല്‍കാതെ പരീക്ഷ നേരിട്ട് നടത്താന്‍ പാടില്ലെന്നും കെഎസ്‌യു സംസ്ഥാന പ്രസിഡന്റ് കെഎം അഭിജിത്ത് ആവശ്യപ്പെട്ടു.
പരീക്ഷ മൂല്യനിര്‍ണയത്തിന് പുതിയ രീതിയാണ് കണ്ടെത്തേണ്ടത്. സംസ്ഥാനത്ത് ഡിജിറ്റല്‍ സൗകര്യം പ്രയോജനപ്പെടുത്താന്‍ കഴിയാത്ത കുട്ടികളും ധാരാളമുണ്ട്. ഇവര്‍ക്ക് പഠനോപകരണങ്ങള്‍ നല്‍കാന്‍ സര്‍ക്കാര്‍ തയ്യാറാകണമെന്നും അദ്ദേഹം പറഞ്ഞു.
സര്‍വകലാശാല പരീക്ഷകള്‍ മാറ്റിവെക്കണമെന്ന് കെപിസിസി അധ്യക്ഷന്‍ കെ സുധാകരന്‍ എംപി കഴിഞ്ഞ ദിവസം പറയുകയും സര്‍ക്കാരിനും ഗവര്‍ണര്‍ക്കും കത്ത് നല്‍കുകയും ചെയ്തിരുന്നു. വിദ്യാര്‍ത്ഥികള്‍ക്ക് ഒരു ഡോസ് വാക്‌സിന്‍ പോലും നല്‍കിയിട്ടില്ലെന്നുള്ളത് സര്‍ക്കാരിന്റെ വീഴ്ചയാണെന്നും സുധാകരന്‍ കുറ്റപ്പെടുത്തി.
സംസ്ഥാനത്ത് കോളേജുകള്‍ തുറക്കാനുള്ള നടപടികളുടെ ഭാഗമായി 18നും 24നും ഇടയില്‍ പ്രായമായവര്‍ക്ക് പ്രത്യേക കാറ്റഗറിയില്‍ ഉള്‍പ്പെടുത്തി വാക്‌സിന്‍ നല്‍കുമെന്ന് മുഖ്യമന്ത്രി പിണറായി വിജയന്‍ വ്യക്തമാക്കിയിട്ടുണ്ട്.
