ഡല്‍ഹി കലാപക്കേസില്‍ ജാമ്യം ലഭിച്ച പൗരത്വ പ്രക്ഷോഭകര്‍ ജയില്‍ മോചിതരായി. നതാഷ നര്‍വാള്‍,ദേവാംഗന കലിത. ആസിഫ് ഇഖ്ബാല്‍ തന്‍ഹ എന്നിവരാണ് പുറത്തിറങ്ങിയത്. വിദ്യാര്‍ത്ഥി നേതാക്കളെ ഉടന്‍ ജയില്‍ മോചിതരാക്കണമെന്ന ഡല്‍ഹി കോടതിയുടെ വിധിക്ക് പിന്നാലെയാണ് നടപടി ഉണ്ടായത്.
ചൊവ്വാഴ്ച ഡല്‍ഹി ഹൈക്കോടതി ഇവര്‍ക്ക് ജാമ്യം അനുവദിച്ചിരുന്നതെങ്കിലും ജയില്‍ മോചിതരായിരുന്നില്ല. നടപടി ക്രമങ്ങള്‍ പൂര്‍ത്തീകരിക്കുന്നതിന് മൂന്ന് ദിവസം സമയം അനുവദിക്കണമെന്നാവശ്യപ്പെട്ട് ഡല്‍ഹി പൊലീസ് ഇന്ന് കോടതിയെ സമീപിച്ചെങ്കിലും അഡീഷണല്‍ സെഷന്‍സ് ജഡ്ജി രവീന്ദര്‍ ബേദി തള്ളുകയായിരുന്നു. പുറമെ ഇവരെ ഉടനെ തന്നെ വിട്ടയക്കണമെന്നാവശ്യപ്പെടുകയും ചെയ്തു. ഹൈക്കോടതി ഇതിനകം ജാമ്യം അനുവദിച്ചതാണെന്നും തിഹാര്‍ ജയിലിലേക്ക് വിട്ടയക്കാനുള്ള ഉത്തരവ് അയച്ചെന്നും കോടതി ചൂണ്ടിക്കാട്ടി.
പൗരത്വ നിയമഭേദഗതിയുമായി ബന്ധപ്പെട്ടുണ്ടായ ഡല്‍ഹി കലാപത്തെ തുടര്‍ന്നാണ് കഴിഞ്ഞ വര്‍ഷം മെയില്‍ മൂവരേയും അറസ്റ്റ് ചെയ്തത്. 3 പേര്‍ക്കും 50,000 രൂപ വീതമുള്ള വ്യക്തിഗത ബോണ്ടുകളിലും സമാനമായ തുകയുടെ രണ്ട് ആള്‍ ജാമ്യത്തിലുമാണ് ഹൈക്കോടതി കഴിഞ്ഞ ദിവസം ജാമ്യം നല്‍കിയത്.
