ഡല്‍ഹി ജിബി പന്ത് ആശുപത്രിയിലെ നഴ്‌സുമാര്‍ മലയാളം സംസാരിക്കരുതെന്ന് സര്‍ക്കുലര്‍. നഴ്‌സിംഗ് അഡ്മിനാണ് വിചിത്രമായ സര്‍ക്കുലര്‍ ഇറക്കിയത്.
മറ്റ് ജീവനക്കാര്‍ക്കും രോഗികള്‍ക്കും കേരളത്തില്‍ നിന്നുള്ള നഴ്‌സുമാര്‍ പരസ്പരം മലയാളത്തില്‍ സംസാരിക്കുന്നത് മനസിലാകുന്നില്ലെന്ന് ചൂണ്ടിക്കാട്ടിയാണ് നടപടി. ഹിന്ദി അല്ലെങ്കില്‍ ഇംഗ്ലീഷ് സംസാരിച്ചില്ലെങ്കില്‍ കടുത്ത നടപടി ഉണ്ടാകുമെന്നും മുന്നറിയിപ്പ് നല്‍കിയിട്ടുണ്ട്. സര്‍ക്കുലറിനെതിരെ ഡല്‍ഹിയിലെ വിവിധ ആശുപത്രികളില്‍ ഉള്ള മലയാളി നഴ്‌സുമാര്‍ പ്രതിഷേധത്തിന് ഒരുങ്ങുകയാണ്.
ആശുപത്രിയുടെ തീരുമാനത്തിനെതിരെ ശശ തരൂര്‍ എംപിയും രംഗത്ത് വന്നിരുന്നു. മലയാള ഭാഷ വിലക്കിയ നടപടി മൗലിക അവകാശങ്ങളുടെ ലംഘനമാണെ്‌ന് ശശ തരൂര്‍ ട്വീറ്റ് ചെയ്തു. ‘ജനാധിപത്യ ഇന്ത്യയില്‍ ഒരു സര്‍ക്കാര്‍ സ്ഥാപനത്തില്‍ നഴ്‌സുമാരോട് അവരുടെ മാതൃഭാഷയില്‍ സംസാരിക്കരുതെന്ന് പറഞ്ഞാല്‍ മനസിലാക്കാനാകില്ല. മനസിനെ വല്ലാതെ അലട്ടുന്നു. ഇത് അസ്വീകാര്യവും അപരിഷ്‌കൃതവും കുറ്റകരവും അടിസ്ഥാന മനുഷ്യാവകാശ ലംഘനവുമാണ്. ഇത് കാലഹരണപ്പെട്ട ശാസനയാണ്’ ശശി തരൂര്‍ തന്റെ ട്വീറ്റില്‍ കുറിച്ചു.
സര്‍ക്കുലര്‍ അത്ഭുതപ്പെടുത്തുന്നതാണെന്ന് എഐസിസി ജനറല്‍ സെക്രട്ടറി കെസി വേണുഗോപാലും പ്രതികരിച്ചു. ഉത്തരവ് പിന്‍വലിക്കണമെന്ന് ആവശ്യപ്പെട്ട് സോഷ്യല്‍ മീഡിയയില്‍ ക്യാമ്പെയിനും തുടങ്ങിയിട്ടുണ്ട്.
