രണ്ടാം പിണറായി മന്ത്രിസഭയില്‍ ആരോഗ്യവകുപ്പ് വീണ ജോര്‍ജിന്. ഒന്നാം പിണറായി സര്‍ക്കാരില്‍ കെകെ ശൈലജ മികച്ച രീതിയില്‍ കൈകാര്യം ചെയ്ത വകുപ്പാണ് വീണ ജോര്‍ജിന് ലഭിച്ചിരിക്കുന്നത്.
ആരോഗ്യമേഖലയില്‍ തുടര്‍ച്ചയായ രണ്ടാം തവണയും വനിത മന്ത്രിയെ നിയമിച്ചു കൊണ്ടാണ് പിണറായി മന്ത്രിസഭയിലെ പട്ടിക. വീണ ജോര്‍ജിലൂടെ ജില്ലയിലെ ആദ്യ വനിത മന്ത്രി എന്ന ചരിത്രം കൂടി പിറന്നു. മാധ്യമ പ്രവര്‍ത്തനത്തിലും ജനപ്രതിനിധി എന്ന നിലക്കും പ്രശസ്തിയാര്‍ജിച്ച വീണയുടെ രണ്ടാം വിജയം ജില്ലയിലെ ഏറ്റവും വലിയ ഭൂരിപക്ഷത്തോടെയായിരുന്നു.
കഴിഞ്ഞ നിയമസഭ തെരഞ്ഞെടുപ്പുകളില്‍ ഇടതുമുന്നണിക്ക് നേട്ടം നല്‍കിയ ജില്ലയാണ് പത്തനംതിട്ട. എങ്കിലും സിപിഐഎമ്മിന് ആദ്യമായാണ് പത്തനംതിട്ടയില്‍ ഒരു മന്ത്രി സ്ഥാനം കൈവരുന്നത്.
2016ല്‍ ന്യൂസ് റൂമില്‍ നിന്നിറങ്ങി നിയമസഭ തെരഞ്ഞെടുപ്പില്‍ മത്സരിക്കുമ്പോള്‍ വീണ ജോര്‍ജിന് സഭ സ്ഥാനാര്‍ത്ഥിയെന്ന ലേബലും കൂട്ടിനുണ്ടായിരുന്നു. സിപിഐഎമ്മിന്റെ രാഷ്ട്രീയ പരീക്ഷണം ശരിയാകുന്ന കാഴ്ചയാണ് പിന്നീടങ്ങോട്ട് കണ്ടത്. 7646 വോട്ടുകളുടെ ഭൂരിപക്ഷത്തിലാണ് 2016ല്‍ വീണ ജയിച്ചതെങ്കില്‍ ഇത്തവണ 19,003 വോട്ടിന്റെ വ്യത്യാസത്തിലാണ് രണ്ടാമതും ജയിച്ച് കയറിയത്. 2016ല്‍ പാര്‍ട്ടി അംഗമല്ലാതെ സിപിഐഎം ചിഹ്നത്തില്‍ മത്സരിച്ച വീണ കഴിഞ്ഞ 5 വര്‍ഷം കൊണ്ട് സംഘടന നേതൃത്വത്തോട് ചേര്‍ന്ന് പോകുന്നതിലും വലിയ മികവാണ് കാഴ്ചവെച്ചത്.
എംഎല്‍എ എന്ന നിലയിലുള്ള മികച്ച പ്രവര്‍ത്തനവും ഒപ്പം സാമുദായിക പരിഗണനയും വീണക്ക് ഗുണം ചെയ്തു. എംകെ ഹേമചന്ദ്രനും അഡ്വ ആര്‍ ചാരമചന്ദ്രന്‍ നായര്‍ക്കും ശേഷം ആറന്‍മുളയില്‍ നിന്നുള്ള മന്ത്രിയാവുകയാണ് വീണ. ഭൗതിക ശാസ്ത്രത്തില്‍ ബിരുദാനന്തര ബിരുദം നേടിയ വീണ നൃത്തം, അഭിനയം തുടങ്ങി കലാരംഗത്തും സജീവസാന്നിധ്യമായിരുന്നു. മാധ്യമ പഠനമില്ലാതെ മാധ്യമപ്രവര്‍ത്തനത്തിലും തിളങ്ങി. കേരളത്തില്‍ ഒരു വാര്‍ത്ത ചാനലിന്റെ എക്‌സിക്യൂട്ടീവ് എഡിറ്ററാകുന്ന ആദ്യ വനിതയും വീണയാണ്. ഓര്‍ത്തഡോക്‌സ് സഭ മുന്‍ സെക്രട്ടറിയും അധ്യാപകനുമായ ഡോ ജോര്‍ജ് ജോസഫാണ് വീണയുടെ ഭര്‍ത്താവ്. അന്നയും ജോസഫുമാണ് മക്കള്‍.
