സംസ്ഥാനത്ത് മാലിന്യമുണ്ടാക്കുന്നവരില്‍ നിന്നും പ്രതിമാസം യൂസര്‍ഫീ ഈടാക്കണമെന്ന് സര്‍ക്കാര്‍ നിര്‍ദ്ദേശം. മാലിന്യമുപയോഗിച്ച് ഭൂമി നികത്താന്‍ അനുവദിക്കില്ല. പൊതു നിരത്തുകളില്‍ മാലിന്യം കത്തിക്കരുതെന്നും സര്‍ക്കാര്‍ നിര്‍ദ്ദേശം നല്‍കി. ഖരമാലിന്യ നിര്‍മാര്‍ജ്ജനത്തിനായി ഓരോ തദ്ദേശഭരണ സ്ഥാപനങ്ങളും പദ്ധതി ഉണ്ടാക്കണം. ദേശീയ ഹരിത ട്രിബ്യൂണലിന്റെ ശിക്ഷാ നടപടി ഭയന്നാണ് സര്‍ക്കാര്‍ കര്‍ശന നടപടിയിലേക്ക് ചുവടുവെച്ചത്.
ഖരമാലിന്യ നിര്‍മാര്‍ജനത്തിനായി കേന്ദ്ര സര്‍ക്കാരിന്റെ 2016ലെ വ്യവസ്ഥകള്‍ സംബന്ധിച്ച് ദേശീയ ഹരിത ട്രിബ്യൂണല്‍ കര്‍ശന നിര്‍ദ്ദേശങ്ങള്‍ പുറപ്പെടുവിച്ചിരുന്നു. വ്യവസ്ഥകള്‍ നടപ്പാക്കാതിരുന്നാല്‍ ബന്ധപ്പെട്ട ഉദ്യോഗസ്ഥര്‍ക്കെതിരെ ശിക്ഷാ നടപടി സ്വീകരിക്കാന്‍ സാധ്യതയുള്ളത് കൊണ്ടാണ് സംസ്ഥാന സര്‍ക്കാരിന്റെ ഈ മാറ്റം.
എല്ലാ പഞ്ചായത്തുകളും നഗരസഭകളും മാലിന്യ സംസ്‌കരണത്തിന് പദ്ധതി തയ്യാറാക്കണമെന്നും സര്‍ക്കാര്‍ നിര്‍ദ്ദേശിച്ചിട്ടുണ്ട്. വാതില്‍പ്പടി ശേഖരണത്തിന് ക്രമീകരണം ഏര്‍പ്പെടുത്തേണ്ടതും ഇവരുടെ ചുമതലയാണ്. മാലിന്യം ശേഖരിക്കുന്നവര്‍ക്കും ഈ മേഖലയിലെ അസംഘടിത തൊഴിലാളികളെ രജിസ്റ്റര്‍ ചെയ്യുകയും തിരിച്ചറിയല്‍ കാര്‍ഡ് വിതരണം ചെയ്യുകയും വേണം. മാലിന്യങ്ങള്‍ വലിച്ചെറിയുന്നത് കര്‍ശനമായി തടയണം. കാലപ്പഴക്കമുള്ള മാലിന്യക്കൂമ്പാരങ്ങളില്‍ ബയോമൈനിംഗ് നടത്തണം. കെട്ടിട നിര്‍മാണത്തിന്റെയും പൊളിക്കലിന്റെയും ഭാഗമായി വരുന്ന മാലിന്യങ്ങളില്‍ നിന്ന് 20 ശതമാനം വരെ സാധനങ്ങള്‍ സര്‍ക്കാര്‍ നിര്‍മാണങ്ങള്‍ക്ക് ഉപയോഗിക്കണമെന്നും സര്‍ക്കാര്‍ നിര്‍ദ്ദേശിച്ചിട്ടുണ്ട്.
