സംസ്ഥാനത്ത് ഇന്ന് ഒറ്റപ്പെട്ട ശക്തമായ മഴയ്ക്ക് സാധ്യതയെന്ന് മുന്നറിയിപ്പ്. കേന്ദ്ര കാലാവസ്ഥാ വകുപ്പാണ് മുന്നറിയിപ്പ് നല്‍കിയത്. ഇടിമിന്നലിനും സാധ്യതയുണ്ട്. എറണാകുളം, കോഴിക്കോട് ജില്ലകളില്‍ യെല്ലോ അലര്‍ട്ടും പ്രഖ്യാപിച്ചു.
ശക്തമായ മഴ പെയ്യുമെന്ന മുന്നറിയിപ്പിനെ തുടര്‍ന്ന് ജില്ലകളില്‍ മുന്നൊരുക്കങ്ങള്‍ തുടങ്ങി. വടക്കന്‍ കേരളത്തിലും മലയോര മേഖലകളിലും ഇടിമിന്നല്‍ രൂക്ഷമായേക്കാം. അതിനാല്‍ മലയോര മേഖലയില്‍ ഉള്ളവര്‍ അതീവ ജാഗ്രത പാലിക്കണം.
ശക്തമായ കാറ്റിന് സാധ്യതയുള്ളതിനാല്‍ കടലില്‍ പോകരുതെന്ന് മുന്നറിയിപ്പ് നല്‍കിയിട്ടുണ്ട്. ഉള്‍ക്കടലില്‍ ഉള്ളവര്‍ എത്രയും വേഗം കരയിലെത്തണം എന്നും അറിയിച്ചു. കടലാക്രമണം മുന്നില്‍ കണ്ട് തീരദേശത്തുള്ളവരും ജാഗ്രത പുലര്‍ത്തണം എന്നും കാലാവസ്ഥാ വകുപ്പ് അറിയിച്ചു.
