കൊവിഡ് ചികിത്സക്ക് ഉപയോഗിക്കുന്ന അലോപ്പതി മരുന്നകള്‍ക്കെതിരെ വ്യാജ പ്രചാരണം നടത്തിയ യോഗ ഗുരു രാംദേവിനെതിരെ പൊലീസ് കേസെടുത്തു. ഛത്തീസ്ഗഢിലെ റായ്പുര്‍ പൊലീസാണ് ഇന്ന് രാമകൃഷ്ണ യാദവ് എന്ന രാംദേവിനെതിരെ എഫ്‌ഐആര്‍ രജിസ്റ്റര്‍ ചെയ്തത്.
ഐപിസി 188, 269, 504 വകുപ്പുകള്‍ പ്രകാരവും കൂടാതെ 2005ലെ ദുരനന്ത നിവാരണ നിയമത്തിലെ വ്യവസ്ഥകള്‍ പ്രകാരവുമാണ് രാംദേവിനെതിരെ കേസെടുത്തത്.
ഇന്ത്യന്‍ മെഡിക്കല്‍ അസോസിയേഷന്‍ ഐഎംഎ ആശുപത്രി ബോര്‍ഡ് ചെയര്‍മാന്‍ രാകേഷ് ഗുപ്ത, റായ്പൂര്‍ ഘടകം പ്രസിഡന്റ് വികാസ് അഗര്‍വാള്‍ എന്നിവര്‍ ബുധാനാഴ്ച രാത്രി നല്‍കിയ പരാതിയിലാണ് കേസെടുത്തതെന്ന് റായ്പുര്‍ സീനിയര്‍ പൊലീസ് സൂപ്രണ്ട് അജയ് യാദവ് പ്രതികരിച്ചു.
കേന്ദ്രസര്‍ക്കാര്‍, ഇന്ത്യന്‍ കൗണ്‍സില്‍ ഓഫ് മെഡിക്കല്‍ റിസര്‍ച്ച് എന്നിവ അംഗീകരിച്ച കൊവിഡ് മരുന്നുകള്‍ക്കെതിരെ കഴിഞ്ഞ 1 വര്‍ഷമായി രാംദേവ് തെറ്റായ വിവരങ്ങളാണ് നല്‍കി കൊണ്ടിരിക്കുന്നത്. ഇതു കൂടാതെ ഭീഷണി പ്രസ്താവനകളും സമൂഹമാധ്യമങ്ങളിലൂടെ പ്രചരിപ്പിക്കുന്നതായി പരാതിയില്‍ ചൂണ്ടിക്കാട്ടിയിട്ടുണ്ട്.
