കേരള പോലീസ് അക്കാദമി ഡോഗ് സ്ക്വാഡ് സെന്ററിലെ അരുമ സ്നേഹസാന്നിദ്ധ്യം “ഹണി” വിടവാങ്ങി. 10 വർഷക്കാലത്തെ സർവ്വീസിനു ശേഷമാണ് ഹണിയുടെ മരണം. സർവ്വീസിൽ നിന്ന് വിരമിച്ച പോലീസ് ഡോഗുകളെ പാർപ്പിയ്ക്കുന്ന റിട്ടയർമെന്റ് സെന്ററായ വിശ്രാന്തിയിൽ വെച്ചാണ് ഹണി അവസാന സല്യൂട്ട് ഏറ്റുവാങ്ങിയത്.
ഐ.ജി.പി ട്രെയിനിംഗ് സേതുരാമൻ സല്യൂട്ട് നൽകി ഹണിയ്ക്ക് അന്ത്യോപചാരമർപ്പിച്ചു. പുഷ്പാർച്ചനയും, റീത്തും സമർപ്പിച്ചു. മുതിർന്ന ഉദ്യോഗസ്ഥരും ചടങ്ങിൽ സംബന്ധിച്ചു. പ്രത്യേക കല്ലറയും, ബലികൂടീരവും ഹണിയ്ക്കായി സജ്ജമാക്കിയിരുന്നു. സംസ്ഥാനത്തെ ഏക ഡോഗ് പരിശീലന കേന്ദ്രമായ കേരള പോലീസ് അക്കാദമിയിൽ പരിശീലനത്തിനെത്തുന്ന മുഴുവൻ ഡോഗുകൾക്കും മാതൃകയും, വഴികാട്ടിയുമായി നിറസാന്നിദ്ധ്യമായ ഹണി സ്റ്റേറ്റ് ഡോഗ് ട്രയിനിംഗ് സെന്ററിലെ കണ്ണിലുണ്ണിയായിരുന്നു.
2012-ലാണ് പോലീസ് ശ്വാനസേനയുടെ ഭാഗമായി ഹണി എത്തിയത്. തൃശൂരിലെ പ്രമുഖ സ്വകാര്യ കെന്നലിൽ നിന്നാണ് രണ്ട് ലാബ്രഡോർ ഇനത്തിലുള്ള പട്ടികളെ കേരള പോലീസിനായി വാങ്ങിയത്, അതിലൊന്നാണ് ഹണി. നല്ലയിനം ബ്രീഡുകളിൽ ഇണചേർത്തതിനെ തുടർന്ന് കേരള പോലീസ് ശ്വാന സേനയ്ക്കായി ഒറ്റ പ്രസവത്തിൽ 7 ഡോഗുകളെയാണ് ഹണി നൽകിയത്. ഹണിയുടെ മക്കളാണ് ഫ്രിഡ, ലൈക്ക, ഡെൽമ, ബെറ്റി, മാർക്കോ, ഹെക്ടർ, ഡോൺ എന്നിവർ. ഇവരെല്ലാം കേരളപോലീസ് ഡോഗ് സ്ക്വാഡ് അംഗങ്ങളായി വിവിധ ജില്ലകളിൽ നാർക്കോട്ടിക് ഡിറ്റക്ഷൻ രംഗത്ത് കഴിവുതെളിയിച്ചവരാണ്. ഹണിയുടെ സഹോദരിയായ ജൂലി ഇപ്പോഴും പാലക്കാട് കെ നയൻ സ്ക്വാഡ് അംഗമായി പ്രവർത്തിയ്ക്കുന്നു.
ലഭ്യമായ ആധുനിക ഉപകരണങ്ങളേക്കാൾ കൂടുതൽ കൃത്യമായി, പരിശീലനം സിദ്ധിച്ച ഡോഗുകൾക്ക് ആയുധങ്ങൾ, ബോംബുകൾ, മയക്കുമരുന്ന്, മറ്റ് വസ്തുക്കൾ എന്നിവ കണ്ടെത്താൻ കഴിയും. ഇത്തരത്തിലുള്ള എക്സ്പ്ലോസീവ് ഡിറ്റക്ഷൻ പരിശീലനമാണ് ഹണിയ്ക്ക് ലഭിച്ചത്. കേരളപോലീസിലെ മാവോയിസ്റ്റ് സാന്നിദ്ധ്യമേഖലകളിൽ ഡ്യൂട്ടിയ്ക്കായി നിയോഗിച്ചിട്ടുണ്ട്. ദുരന്തനിവാരണത്തിനിടയിലും തീവ്രവാദ ആക്രമങ്ങൾക്കിടയിലും, ബോംബ് കണ്ടെത്തൽ പ്രക്രിയയിലൂടെ സൈനികരുടെയും പോലീസിന്റെയും ഉത്തമസുഹൃത്താണ് എക്സ്പ്ലോസീവ് ഡിറ്റക്ഷൻ ഡോഗുകൾ.
തികഞ്ഞ പോരാളിയായ ഹണിയുടെ വിയോഗം സംസ്ഥാന ഡോഗ് സ്ക്വാഡിന് തീരാ നഷ്ടമാണ്. ഏതൊരു പ്രതിസന്ധിയെയും അതിജീവിയ്ക്കാവുന്ന പരിശീലനം നേടിയ ഹണിയെ പൊതുപരിപാടികളിലും, പൊതുയോഗങ്ങളിലും സുരക്ഷ ഉറപ്പാക്കുന്നതിനായി പരിശോധനയ്ക്ക് നിയോഗിച്ചിരുന്നു.പ്രധാനമന്ത്രി, രാഷ്ട്രപതി,ഗവർണർ തുടങ്ങിയ വി.വി.ഐ.പി സുരക്ഷാ പരിശോധനയിൽ ഹണി മുഖ്യപരിശോധക ആയിരുന്നു.
