വിഖ്യാത ബോളിവുഡ് നടന്‍ ദിലീപ് കുമാര്‍ അന്തരിച്ചു. വാര്‍ധക്യ സഹജമായ അസുഖങ്ങളെ തുടര്‍ന്ന് തന്റെ 98ാമത്തെ വയസിലാണ് അന്ത്യം. ആശുപത്രിയില്‍ ചികിത്സയില്‍ കഴിയുകയായിരുന്നു. ജൂണ്‍ 30നാണ് ആരോഗ്യ നില വഷളായതിനെ തുടര്‍ന്ന് മുംബൈയിലെ ഹിന്ദുജ ആശുപത്രിയില്‍ പ്രവേശിപ്പിച്ചത്.
ആറ് പതിറ്റാണ്ട് കാലത്തെ നീണ്ട അഭിനയ ജീവിതത്തില്‍ 65ലധികം ചിത്രങ്ങളിലാണ് ദിലീപ് കുമാര്‍ തന്റെ വേഷങ്ങള്‍ പകര്‍ന്നാടിയത്. 1955ലെ ദേവ്ദാസ്, 1957ലെ നയാ ദോര്‍, 1960ലെ മുഗള്‍-ഇ-ആസം, 1961ലെ ഗംഗ യമുന, 1981ലെ ക്രാന്തി, 1986ല്‍ കര്‍മ്മ, 1998ല്‍ ഖില എന്നിവയാണ് ശ്രദ്ധേയമായ ചിത്രങ്ങള്‍.
1966ലാണ് അഭിനേത്രി സൈറ ബാനുവിനെ ദിലീപ് കുമാര്‍ തന്റെ ജീവിതത്തിലേക്ക് കൂടെക്കൂട്ടിയത്. ഗോപി, സഗിന. ബൈരാഗ് എന്നീ ചിത്രങ്ങളില്‍ ഇരുവരും ഒന്നിച്ച് അഭിനയിച്ചിരുന്നു.
1991ല്‍ പത്മഭൂഷണ്‍, 1994ല്‍ ദാദാ സാഹിബ് ഫാല്‍കെ പുരസ്‌കാരം, 2015ല്‍ പത്മവിഭൂഷണ്‍ എന്നീ പുരസ്‌കാരങ്ങള്‍ അദ്ദേഹത്തെ തേടിയെത്തി.
