മലപ്പുറം മഞ്ചേരി പന്തല്ലൂരില് പുഴയില് ഒഴുക്കില്പ്പെട്ട മൂന്നാമത്തെ കുട്ടിയുടെ മൃതദേഹവും കണ്ടെത്തി. കുട്ടികള് കുളിച്ചുകൊണ്ടിരിക്കുന്നതിന് സമീപത്ത് നിന്നാണ് മൃതദേഹം കണ്ടെത്തിയത്. നേരത്തെ പുഴയില് ഒഴുക്കില്പ്പെട്ട രണ്ട് കുട്ടികള് മരിച്ചിരുന്നു. ഒരാളെ ജീവനോടെ രക്ഷപ്പെടുത്തിയിട്ടുണ്ട്. ഫാത്തിമ, ഇസ്രത്ത്, ഫാത്തിമ ഫിദ എന്നിവരാണ് മരിച്ചത്.
ഉച്ചക്ക് ഒരു മണിക്കാണ് ഒരു കുടുംബത്തില് നിന്നുളള കുട്ടികള് മില്ലുംപടി കടവില് കുളിക്കാനായി പോയത്. കുട്ടികളുടെ കരച്ചില് കേട്ട് ഓടിക്കൂടിയ നാട്ടുകാരാണ് ആദ്യം രക്ഷാപ്രവര്ത്തനം നടത്തിയത്. ഒഴുക്കില്പ്പെട്ട് വരുന്നതിനിടെയാണ് രണ്ട് കുട്ടികളെ പ്രദേശവാസി കരീം ആണ് കരക്കെത്തിച്ചത്.
മഞ്ചേരി മെഡിക്കല് കോളേജിലേക്ക് കുട്ടികളെ എത്തിച്ചപ്പോഴേക്കും രണ്ട് പേരും മരണപ്പെട്ടിരുന്നു. ഫയര്ഫോഴ്സും നാട്ടുകാരും ചേര്ന്നാണ് തെരച്ചില് നടത്തിയത്. മലപ്പുറം ജില്ലാ കളക്ടര് സംഭവസ്ഥലം സന്ദര്ശിച്ചു.