ആന്ധ്രപ്രദേശില്‍ ഓക്‌സിജന്‍ ക്ഷാമം മൂലം 11 രോഗികള്‍ മരിച്ചു. തിരുപ്പതി റൂയ്യ സര്‍ക്കാര്‍ ആശുപത്രിയിലാണ് സംഭവം നടന്നത്. ഓക്‌സിജന്‍ വിതരണം 45 മിനിട്ടോളം തടസപ്പെട്ടുവെന്ന് ബന്ധുക്കള്‍ ആരോപിക്കുന്നു. മുഖ്യമന്ത്രി വൈഎസ് ജഗന്‍മോഹന്‍ റെഡ്ഡി സംഭവത്തില്‍ അന്വേഷണത്തിനായി ഉത്തരവിട്ടിട്ടുണ്ട്.
അതെസമയം രാജ്യത്തെ പ്രതിദിന കൊവിഡ് കേസുകളില്‍ നേരിയ കുറവ് വന്നിട്ടുണ്ട്. മഹാരാഷ്ട്രയില്‍ കഴിഞ്ഞ ദിവസങ്ങളെ അപേക്ഷിച്ച് പ്രതിദിന കേസുകളുടെ എണ്ണം നാല്‍പ്പതിനായിരത്തിന് താഴെ രേഖപ്പെടുത്തി. മരണസംഖ്യ 500ന് മുകളില്‍ തുടരുകയാണ്. 37,236 പേര്‍ക്കാണ് രോഗം സ്ഥിരീകരിച്ചത്. 61,607 പേര്‍ കൊവിഡ് ബാധയില്‍ നിന്നും വിമുക്തരായി.
മഹാരാഷ്ട്രയേക്കാള്‍ കര്‍ണാടകയില്‍ പ്രതിദിന കൊവിഡ് കേസുകള്‍ വര്‍ധിച്ചുവരികയാണ്. 39,305 പേര്‍ക്കാണ് രോഗം സ്ഥിരീകരിച്ചത്. കഴിഞ്ഞ 24 മണിക്കൂറിനിടെ 596 പേരാണ് കൊവിഡ് മൂലം കര്‍ണാടകയില്‍ മാത്രം മരണപ്പെട്ടത്.
തമിഴ്‌നാട്ടില്‍ 28,978 പേര്‍ക്കും ഉത്തര്‍പ്രദേശില്‍ 21,277 പേര്‍ക്കും രോഗം സ്ഥിരീകരിച്ചു. സംസ്ഥാനങ്ങള്‍ പുറത്തുവിട്ട കണക്കുകള്‍ പ്രകാരം മൂന്നര ലക്ഷത്തിന് താഴെയാണ് പ്രതിദിന രോഗികള്‍.
