സംസ്ഥാനത്ത് ഉടൻ മഴ ലഭിച്ചില്ലെങ്കിൽ ഉഷ്ണതരംഗത്തിന് സാധ്യതയെന്ന് കാലാവസ്ഥ ഗവേഷകരുടെ മുന്നറിയിപ്പ്. പാലക്കാട്, പുനലൂർ, കോട്ടയം എന്നിവിടങ്ങളിലാണ് ഉഷ്ണ തരംഗം അനുഭവപ്പെടുക. അതിതീവ്രമായ കാലാവസ്ഥ വ്യതിയാനമാണ് സംസ്ഥാനത്ത് സംഭവിച്ചുകൊണ്ടിരിക്കുന്നത്. സാധാരണ ഡിസംബർ, ജനുവരിയിൽ അനുഭവപ്പെടാറുളള തണുപ്പ് ഇപ്പോഴില്ല. പലയിടത്തും 38 ഡിഗ്രി ചൂടാണ് രേഖപ്പെടുത്തുന്നത്. വരും ദിവസങ്ങളിൽ മഴ ലഭിച്ചില്ലെങ്കിൽ ചൂട് 40 ഡിഗ്രി
കടക്കുമെന്നാണ് വിലയിരുത്തൽ. ഇത് ഉഷ്ണതരംഗത്തിലേയ്ക്ക് നയിക്കും.പാലക്കാട്, പുനലൂർ, കോട്ടയം എന്നീ സ്ഥലങ്ങൾക്ക് പുറമെ സംസ്ഥാനത്ത് മറ്റെവിടെ വേണമെങ്കിലും ഉഷ്ണതരംഗം പ്രതീക്ഷിക്കാമെന്നും കാലാവസ്ഥ വിദഗ്ധർ മുന്നറിയിപ്പ് തരുന്നു. 2016 ലാണ് സംസ്ഥാനത്ത് ആദ്യമായി ഉഷ്ണതരംഗം അനുഭവപ്പെട്ടത്
