വാക്‌സിന്‍ ക്ഷാമം രൂക്ഷമാകുന്നതിനിടക്ക് ആശ്വാസമേകി കേന്ദ്രം. സംസ്ഥാനങ്ങള്‍ക്ക് 53.25 ലക്ഷം ഡോസ് വാക്‌സിനാണ് കേന്ദ്ര സര്‍ക്കാര്‍ അനുവദിച്ചിരിക്കുന്നത്. കേരളത്തിന് 1,84,070 ഡോസ് വാക്‌സിനാണ് അനുവദിച്ചിരിക്കുന്നത്.
രോഗവ്യാപനം രൂക്ഷമായ മഹാരാഷ്ട്രക്ക് 6.03 ലക്ഷം ഡോസും കര്‍ണാടകക്ക് 3.01 ലക്ഷം ഡോസും വാക്‌സിന്‍ വിതരണം ചെയ്യും. മൂന്ന് ദിവസത്തിനുള്ളില്‍ തന്നെ വിതരണം ചെയ്യാനാണ് തീരുമാനം.
രാജ്യത്ത് വാക്‌സിന്‍ വിതരണം ആരംഭിച്ചത് മുതല്‍ സംസ്ഥാനങ്ങള്‍ക്കും കേന്ദ്ര ഭരണപ്രദേശങ്ങള്‍ക്കുമായി ഇതുവരെ 17.49 കോടി ഡോസ് വാക്‌സിന്‍ നല്‍കിയെന്ന് ആരോഗ്യമന്ത്രാലയം വ്യക്തമാക്കി. 84 ലക്ഷം ഡോസ് വാക്‌സിന്‍ സംസ്ഥാനങ്ങളുടെ കൈവശം അവശേഷിക്കുന്നുണ്ടെന്നും ആരോഗ്യമന്ത്രാലയം കൂട്ടിച്ചേര്‍ത്തു.
