കൊവിഡ് രണ്ടാം തരംഗത്തില്‍ വിറങ്ങലിച്ച് രാജ്യം. പ്രതിദിന കണക്ക് ഓരോ ദിവസവം കഴിയുന്തോറും കൂടി വരുന്നത് ആശങ്കകള്‍ കൂട്ടുന്നു. രാജ്യത്ത് ഏറ്റവും തീവ്രവ്യാപനമുള്ള മഹാരാഷ്ട്രയില്‍ ഇന്ന് 63,729 പേര്‍ക്കാണ് കൊവിഡ് സ്ഥിരീകരിച്ചിരിക്കുന്നത്. 398 മരണവും റിപ്പോര്‍ട്ട് ചെയ്തു. എന്നാല്‍ കര്‍ണാടകയിലും സ്ഥിതി വഷളാക്കി കൊണ്ട് പ്രതിദിന കൊവിഡ് കേസുകള്‍ വര്‍ധിച്ച് വരികയാണ്. ഇന്ന് മാത്രം പതിനയ്യായിരത്തിനടുത്താണ് കൊവിഡ് കേസുകള്‍ രജിസ്റ്റര്‍ ചെയ്തത്.
ഇതുവരെയുള്ളതില്‍ ഏറ്റവും വലിയ രോഗവ്യാപനമാണിത്. 14859 പേര്‍ക്ക് രോഗം സ്ഥിരീകരിച്ചപ്പോള്‍ 78 പേരാണ് മരിച്ചത്. 9917 രോഗികളും ബെംഗളൂരു നഗരത്തില്‍ നിന്നുള്ളതാണെന്നത് ജനങ്ങളില്‍ ആശങ്കയുണ്ടാക്കിയിട്ടുണ്ട്. 57 പേരാണ് ഇവിടെ മാത്രം മരിച്ചത്. അതെസമയം, കൊവിഡ് രൂക്ഷമാകുന്ന പശ്ചാത്തലത്തില്‍ സംസ്ഥാനങ്ങള്‍ നിയന്ത്രണങ്ങള്‍ കടുപ്പിക്കുകയാണ്.
ഉത്തര്‍പ്രദേശ്, രാജസ്ഥാന്‍, പഞ്ചാബ് എന്നിവിടങ്ങളില്‍ രാത്രികാല കര്‍ഫ്യൂ ഏര്‍പ്പാടാക്കി. ദില്ലിയില്‍ വാരാന്ത കര്‍ഫ്യൂ നാളെ മുതല്‍ ആരംഭിക്കും. പൊതുസ്ഥലങ്ങളില്‍ നിയന്ത്രണം തുടരും. കേരളത്തിലും പ്രതിദിന കൊവിഡ് കേസുകള്‍ ഇന്ന് പതിനായിരം കടന്നു. ഇന്ന് മാത്രം 10,031 കേസുകളാണ് റിപ്പോര്‍ട്ട് ചെയ്തത്.
