ബന്ധു നിയമനക്കേസില്‍ കെടി ജലീലിന് മന്ത്രിയായി തുടരുന്നതിന് അര്‍ഹതയില്ലെന്ന ലോകായുക്ത വിധി തള്ളി മന്ത്രിയെ സംരക്ഷിക്കാനുള്ള സിപിഎം തീരുമാനം ജനാധിപത്യ വാഴ്ചയോടും പൊതു സമൂഹത്തോടുമുള്ള വെല്ലുവിളിയാണെന്ന് പ്രതിപക്ഷ നേതാവ് രമേശ് ചെന്നിത്തല.
കോടതിയില്‍ നിന്ന് മോശമായ പരാമര്‍ശങ്ങള്‍ ഉണ്ടാകുമ്പോള്‍ മന്ത്രിമാര്‍ രാജിവെച്ച് ഉന്നതമായ ജനാധിപത്യമൂല്യം ഉയര്‍ത്തിപ്പിടിച്ച എത്രയോ സംഭവങ്ങള്‍ കേരളത്തിലുണ്ടായിട്ടുണ്ട്‌. കെഎം മാണിക്കെതിരെ സംശയത്തിന്റെ പേരില്‍ മാത്രം കോടതി പരാമര്‍ശമുണ്ടായപ്പോള്‍ അദ്ദേഹം രാജിവെക്കണമെന്ന് മുറവിളി കൂട്ടിയതും ഇതേ സിപിഎമാണ്. അന്ന് കെഎം മാണി രാജിവെക്കുകയും ചെയ്തുവെന്നും ചെന്നിത്തല ചൂണ്ടിക്കാട്ടി.
ഇവിടെ ലോകായുക്ത സംശയമല്ല മന്ത്രി കെടി ജലീലിനെതിരെ പറഞ്ഞിരിക്കുന്നത്. മന്ത്രി സ്വജനപക്ഷപാതം കാട്ടിയെന്നും അധികാര ദുര്‍വിനിയോഗം നടത്തിയെന്നും അതിനാല്‍ മന്ത്രി സ്ഥാനത്ത് തുടരാന്‍ അര്‍ഹനല്ലെന്നും വ്യക്തമായി തന്നെയാണ് ലോകായുക്തയുടെ വിധി. ഈ വിധി വന്നിട്ടും മന്ത്രി രാജിവെക്കേണ്ടതില്ല എന്ന് പറയുന്ന സിപിഎം അഴിമതിക്ക് അംഗീകാരം നല്‍കുകയാണ് ചെയ്യുന്നത്. മുഖ്യമന്ത്രി ഉള്‍പ്പടെ അഴിമതിയില്‍ മുങ്ങിക്കുളിച്ചു നില്‍ക്കുന്ന ഒരു സര്‍ക്കാര്‍ ഇങ്ങനെ ചെയ്യുന്നതില്‍ അത്ഭുതപ്പെടാനില്ലെന്നും ചെന്നിത്തല കൂട്ടിച്ചേര്‍ത്തു.
അഴിമതി തടയുക എന്ന ലക്ഷ്യത്തിലാണ് ലോകായുക്ത എന്ന സംവിധാനം രൂപീകരിച്ചത്. അതിന്റെ വിധി മാനിക്കാതിരിക്കുക എന്നത് അഴിമതി ആറും തടയരുത് എന്നു പറച്ചിലിന് തുല്യമാണ്. അഴിമതിക്കെതിരെ മുമ്പ് സിപിഎം ഘോരഘോരം പ്രസംഗിച്ചതെല്ലാം വെറുതെയാണെന്നും അതെല്ലാം വെറും വാചക കസര്‍ത്ത് മാത്രമാണെന്നും തെളിഞ്ഞു കഴിഞ്ഞു.
കോടതി പരാമര്‍ശത്തിന്റെ പേരില്‍ രാജി വെക്കേണ്ടതില്ലെന്ന നിയമമന്ത്രി എകെ ബാലന്റെ പ്രസ്താവന ഇടതുമുന്നണി എത്രമാത്രം ജീര്‍ണിച്ചുവെന്നതിന് തെളിവാണ്. വോട്‌ടെടുപ്പ് കഴിഞ്ഞ സ്ഥിതിക്ക് ഈ സര്‍ക്കാരിന് കേവലം ഒരു കാവല്‍ മന്ത്രിസഭയുടെ പദവിയേ ഉള്ളൂ. കഷ്ടിച്ച് കുറച്ച് ദിവസങ്ങള്‍ മാത്രമാണ് കാലാവധിയായി ബാക്കിയുള്ളത്. എന്നിട്ടും ജലീലിനെ അധികാരത്തില്‍ തുടരാന്‍ പിന്തുണ നല്‍കുന്ന സിപിഎം എത്രത്തോളം ജനവിരുദ്ധമായിക്കഴിഞ്ഞു എന്ന് ജനങ്ങള്‍ തിരിച്ചറിയുമെന്നും രമേശ് ചെന്നിത്തല വ്യക്തമാക്കി.
