അകമലയിൽ താത്ക്കാലികമായി ആർ.ആർ.ടി പ്രവർത്തനമാരംഭിക്കും: കെ. രാധാകൃഷ്ണൻ എം.പി

0

തൃശ്ശൂർ ജില്ലയിലെ ചേലക്കര – വടക്കാഞ്ചേരി പ്രദേശങ്ങളിൽ കുറച്ചു ദിവസങ്ങളായി തുടരുന്ന കാട്ടാന ഉൾപ്പെടെയുള്ള വന്യജീവി ആക്രമണത്തിൽ അടിയന്തര നടപടി സ്വീകരിക്കുന്നതിനായി കെ. രാധാകൃഷ്ണൻ എം.പി യുടെ അധ്യക്ഷതയിൽ ഉന്നതതല യോഗം ചേർന്നു. താത്ക്കാലിക റാപ്പിഡ് റെസ്പോൺസ് ടീമിനെ അകമല കേന്ദ്രീകരിച്ച് തിങ്കളാഴ്ച്ച തന്നെ പ്രവർത്തിക്കാൻ നടപടി സ്വീകരിക്കുമെന്ന് എം.പി അറിയിച്ചു.

മേഖലയിലെ ഫോറസ്റ്റ് ഓഫീസുകളിലെ ജീവനക്കാരുടെ അപര്യാപ്തത പരിഹരിക്കുന്നതിനായി ജീവനക്കാരെ മറ്റു മേഖലകളിൽ നിന്ന് പുനർവിന്യസിക്കും. ചേലക്കര, വാഴാനി പ്രദേശങ്ങളിൽ നടന്നു കൊണ്ടിരിക്കുന്ന സോളാർ ഫെൻസിങ് പ്രവർത്തി അടിയന്തരമായി പൂർത്തീകരിക്കാനും പ്രദേശത്ത് മൃഗങ്ങളുടെ സാന്നിധ്യം അറിയാൻ സെൻസറുകൾ സ്ഥാപിക്കാനും യോഗത്തിൽ തീരുമാനിച്ചു.

വനയോര മേഖലകളിലെ പൊതുജനങ്ങളെയും ജനപ്രതിനിധികളെയും ഉൾപ്പെടുത്തി കൊണ്ടുള്ള പി.ആർ.ടി കളുടെ പരിശീലനം ആഗസ്റ്റ് 13 ന് ആരംഭിക്കും.
ആനകളെ ജനവാസ മേഖലയിൽ നിന്ന് തിരിച്ചയക്കാൻ ആക്ഷൻ പ്ലാൻ തയ്യാറാക്കി വേഗത്തിൽ നടപ്പിലാക്കാനും നിർദ്ദേശം നൽകി. കുതിരാൻ പദ്ധതിയുടെ ഭാഗമായി ലഭ്യമായ ഫണ്ട് ഈ വിഷയത്തിൽ ഗുണപ്രദമായി വിനിയോഗിക്കും. ഘട്ടം ഘട്ടമായി ആനകളെ ഇവിടെ നിന്നും തുരത്തി പിന്നീട് ജനവാസ മേഖലയിലേക്ക് കടക്കാതിരിക്കാനുള്ള നടപടികൾ സ്വീകരിക്കും. പീച്ചി, വാഴാനി ഉദ്യോഗസ്ഥരുടെ നേതൃത്വത്തിൽ ആഗസ്റ്റ് 13 ന് യോഗം ചേരും. മൃഗങ്ങളുടെ സാന്നിധ്യമുള്ള പ്രദേശങ്ങളിൽ സൂചന ബോർഡുകൾ സ്ഥാപിക്കും.

പഞ്ചായത്തുകൾ കേന്ദ്രീകരിച്ച് യോഗം ചേരാനും ജാഗ്രതാ സമിതികളുടെ സേവനം മെച്ചപ്പെടുത്താനും നടപടി വേണമെന്നും ജനങ്ങളിൽ ആത്മ വിശ്വാസം വർധിപ്പിക്കാനുള്ള പ്രവർത്തനം വനം വകുപ്പിൽ നിന്ന് ഉണ്ടാകണമെന്നും സമയബന്ധിതമായി എല്ലാ തീരുമാനങ്ങൾ നടപ്പാക്കണമെന്നും എം.പി അറിയിച്ചു.

എം.എൽ.എമാരായ സേവ്യർ ചിറ്റിലപ്പിള്ളി, യു.ആർ പ്രദീപ്, വടക്കാഞ്ചേരി നഗരസഭ ചെയർമാൻ പി.എൻ സുരേന്ദ്രൻ, വടക്കാഞ്ചേരി ബ്ലോക്ക് പഞ്ചായത്ത് പ്രസിഡൻ്റ് കെ.വി നഫീസ, പഴയന്നൂർ ബ്ലോക്ക് പഞ്ചായത്ത് പ്രസിഡൻ്റ് കെ.എം അഷറഫ്,
ചീഫ് കൺസർവേറ്റർ ഓഫ് ഫോറസ്റ്റ് ആടലരശൻ, ഡി.എഫ്.ഒ ഇൻ ചാർജ്ജ് അഭയ് യാദവ്, ഡെപ്യൂട്ടി കളക്ടർ സി.എസ് രാജേഷ്, ചേലക്കര ഗ്രാമപഞ്ചായത്ത് പ്രസിഡൻ്റ് എം.കെ പത്മജ, മുള്ളൂർക്കര പ്രസിഡൻ്റ് ഗിരിജ മേലേടത്ത്, തെക്കുംകര ഗ്രാമപഞ്ചായത്ത് പ്രസിഡൻ്റ് ടി.വി സുനിൽകുമാർ, കുന്നംകുളം എ.സി.പി സന്തോഷ് കുമാർ, ജില്ലാ പഞ്ചായത്ത് അംഗങ്ങളായ കെ.ആർ മായ, പി. സാബിറ, വിവിധ സ്റ്റേഷനുകളിലെ ഫോറസ്റ്റ്, പോലീസ് ഉദ്യോഗസ്ഥർ, ജനപ്രതിനിധികൾ, കർഷകർ, പൊതു പ്രവർത്തകർ തുടങ്ങിയവർ യോഗത്തിൽ പങ്കെടുത്തു.