ഭാരതത്തിലെ പ്രധാന ക്രൈസ്തവ സഭകളിലെ ഔദ്യോഗിക സംഘടനകളും സഭാതല അല്‍മായ നേതാക്കളും പങ്കെടുത്ത് സംയുക്ത ക്രൈസ്തവ ഐക്യ നേതൃ സമ്മേളനം കൊച്ചിയിൽ ചേർന്നു. താമരശ്ശേരി രൂപത മെത്രാനും കത്തോലിക്ക കോണ്‍ഗ്രസ് ബിഷപ്പ് ലെഗേറ്റും ആയ മാര്‍ റെമിജിയോസ് ഇഞ്ചനാനിയില്‍ ഉദഘാടനം ചെയ്തു.
വിവിധ ക്രൈസ്തവ സഭകളിലെ അല്‍മായ കൂട്ടായ്മ കാലഘട്ടത്തിൻ്റെ ആവശ്യം ആണെന്നും ഒന്നിച്ച് നിലകൊള്ളാന്‍ കടപ്പെട്ടവരാണ് ക്രൈസ്തവ വിഭാഗങ്ങള്‍ എന്നും ബിഷപ്പ് പറഞ്ഞു. തുല്ല്യ നീതിക്കായി ഒന്നിച്ചു പോരാടാന്‍ ബിഷപ്പ് വിവിധ സഭാ നേതാക്കളെ ആഹ്വനം ചെയ്തു.
സീറോ മലബാര്‍ സഭ, ലത്തീന്‍ സഭ, മലങ്കര സഭ, യാക്കോബായ സഭ, ഓര്‍ത്തഡോക്‌സ് സഭ, മാര്‍ത്തോമ്മ സഭ, കല്‍ദായ സഭ തുടങ്ങിയ സഭകളിലെ നേതൃ പ്രതിനിധികള്‍ പ്രഥമ യോഗത്തില്‍ പങ്കെടുത്തു. ന്യുനപക്ഷ അവകാശ പോരാട്ടങ്ങളിലും പരിവര്‍ത്തിത വിഭാഗങ്ങളുടെ അവകാശങ്ങള്‍ക്ക് വേണ്ടിയും പൊതു പ്രശ്‌നങ്ങളിലും സഹകരിച്ചു ഒറ്റക്കെട്ടായി പ്രവര്‍ത്തിക്കുവാന്‍ യോഗം തീരുമാനിച്ചു.
എല്ലാ സഭകളുടെയും പ്രതിനിധികളെ ഉള്‍പ്പെടുത്തി യുണൈറ്റഡ് ക്രിസ്ത്യന്‍ മൂവ്‌മെൻ്റ് എന്ന പേരില്‍ ഏകോപന സമിതിക്ക് രൂപം നല്‍കി. കത്തോലിക്ക കോണ്‍ഗ്രസ് പ്രസിഡൻ്റ് അഡ്വ ബിജു പറയന്നിലം ആണ് ചീഫ് കോര്‍ഡിനേറ്റര്‍.
മൂവ്‌മെൻ്റിൻ്റെ നേതൃത്വത്തില്‍ പ്രധാന മന്ത്രിയെയും, മുഖ്യമന്ത്രിയെയും കണ്ട് ന്യുനപക്ഷ വിഷയങ്ങള്‍ അവതരിപ്പിക്കുവാനും പൊതു അപ്പീല്‍ സമര്‍പ്പിക്കാനും തീരുമാനിച്ചു. ജെ.ബി. കോശി കമ്മീഷന്‍ മുമ്പാകെ സംയുക്ത നിവേദനം സമര്‍പ്പിക്കുവാനും യോഗം തീരുമാനിച്ചു. കത്തോലിക്ക കോണ്‍ഗ്രസ് ഗ്ലോബല്‍ സമിതി പ്രസിഡൻ്റ് അഡ്വ ബിജു പറയന്നിലം അദ്ധ്യക്ഷനായി.
