പാലക്കാട് പട്ടാമ്പിയില്‍ പ്രായപൂര്‍ത്തിയാകാത്ത പെണ്‍കുട്ടിയെ മയക്കുമരുന്നിന് അടിമയാക്കി പീഡിപ്പിച്ചെന്ന പരാതിയുമായി പെണ്‍കുട്ടിയുടെ അമ്മ. മുഖ്യമന്ത്രിക്കും ഡിജിപിക്കുമാണ് പരാതി നല്‍കിത്. വിവാഹ വാഗ്ദാനം നല്‍കിയാണ് 25കാരന്‍ പെണ്‍കുട്ടിയെ പീഡനത്തിനിരയാക്കിയത്.
കഞ്ചാവ്, കൊക്കെയ്ന്‍, എംഡിഎംഎ എന്നീ ലഹരി വസ്തുക്കള്‍ക്ക് പെണ്‍കുട്ടിയെ യുവാവ് അടിമയാക്കിയെന്നും പരാതിയില്‍ പറയുന്നു. ക്രൂരമായ പീഡനത്തേയും ഭീഷണിയേയും തുടര്‍ന്ന് മാനസിക നില തകരാറിലായ പെണ്‍കുട്ടി തൃശൂര്‍ മെഡിക്കല്‍ കോളേജില്‍ ചികിത്സയില്‍ കഴിയുകയാണ്.
ഇതിനിടെ പെണ്‍കുട്ടിയുടെ നഗ്ന ചിത്രങ്ങള്‍ ആവശ്യപ്പെട്ട് പലതവണ യുവാവ് ഭീഷണിപ്പെടുത്തിയെന്നും പെണ്‍കുട്ടിയുടെ അമ്മ നല്‍കിയ പരാതിയില്‍ വ്യക്തമാക്കുന്നു. ഏപ്രില്‍ 30ന് യുവാവ് പെണ്‍കുട്ടിയെ ജോലി വാഗ്ദാനം ചെയ്ത് വീട്ടില്‍ നിന്നിറക്കുകയും മെയ് അഞ്ച്, ആറ്, എട്ട്, പതിനാറ് തീയതികളില്‍ പലയിടങ്ങളിലും വെച്ച് ലൈംഗീകമായി പീഡിപ്പിച്ചുവെന്നും പരാതിയില്‍ ആരോപിക്കുന്നു. സംഭവത്തില്‍ മുഖ്യമന്ത്രിക്കും ഡിജിപിക്കും കുടുംബം പരാതി നല്‍കി.
