ജമ്മു കശ്മീരില്‍ പ്രധാനമന്ത്രി നരേന്ദ്രമോദി വിളിച്ചു ചേര്‍ത്ത സര്‍വകക്ഷിയോത്തില്‍ പങ്കെടുക്കുമെന്ന് കോണ്‍ഗ്രസ്. ജമ്മുകശ്മീരിലെ കോണ്‍ഗ്രസ് വക്താവ് രവീന്ദര്‍ ശര്‍മ്മയാണ് ഇക്കാര്യം അറിയിച്ചത്. കോണ്‍ഗ്രസ് അധ്യക്ഷ സോണിയ ഗാന്ധിയുടെ നേതൃത്വത്തില്‍ ചേര്‍ന്ന യോഗത്തിലാണ് തീരുമാനമെന്നും അദ്ദേഹം വ്യക്തമാക്കി.
യോഗത്തില്‍ മുന്‍ പ്രധാനമന്ത്രി മന്‍മോഹന്‍ സിംഗ്, മുതിര്‍ന്ന നേതാക്കളായ കരണ്‍ സിംഗ്, പി ചിദംബരം, ഗുലാം നബി ആസാദ്, രജനി പാട്ടീല്‍, ജിഎ മിര്‍, താരിഖ് ഹമീദ് കാര എന്നിവര്‍ പങ്കെടുത്തു.
കേന്ദ്രഭരണ പ്രദേശത്തിന്റെ ഭാവി നടപടികളെക്കുറിച്ച് ചര്‍ച്ച ചെയ്യുന്നതിനായി ജമ്മുകശ്മീരില്‍ നിന്നുള്ള 14 നേതാക്കളെയാണ് പ്രധാനമന്ത്രിയുടെ യോഗത്തിലേക്ക് ക്ഷണിച്ചിരിക്കുന്നത്. ജമ്മുകശ്മീര്‍ പ്രദേശ് കോണ്‍ഗ്രസ് കമ്മിറ്റി പ്രസിഡന്റ് ജിഎ മിര്‍, പാര്‍ട്ടി നേതാവും മുന്‍ മുഖ്യമന്ത്രിയുമായ ഗുലാം നബി ആസാദ് എന്നിവരാണ് ക്ഷണിക്കപ്പെട്ടവര്‍.
